Home Region In-/Ausland Sport Agenda Magazin
Leserbrief
Leserbriefe
23.06.2022

Falschä Walsärstolz

Bild: unsplash
Ein Leserbrief von Daniela Risch vo Chüblisch

800 Jahrfiir z Chlostersch 2022 im Zeicha «Walserstolz und Weltgeschichten». I frega mi aber, uf was sindsch de stolz? Wenn alli altä Walsärhüscher flüchä müand?! So bini doch am Donnstig morgät vo Chüblisch dürin gä Chlostärsch gfahrä, mit dm Ortsbus. Wiäni abluägä bim Old-Inn, gsiäni wiä äs übär 300-jährigs Walserhuus gopfärät chunnd. Denn au äs paar Männär, wos am abbrächä sind.

Äs Huus wo Zügä ischt, vo ünschnä Vorfahrä. Für mi ischt das Motto «Walsärstolz» föllig än billigi Insziniärig und fehl am Platz für Chlostärsch. Und drzuä no protzä mit Walsärstolz. Was ischt das nu für äs Värbrächä! Was deichänd da au ünschi Nachchommä. Äs stimmt mi truurig und macht mi wüatig midänand. Woni duä ufäm Heimwäg die abgäbrochnä Bälkä liggä gseh han ufm Bodä, ischt mär gsin, schi heiend no gechzät. Astigi Bälkä, wo jetz värstummt sind. Wo dr herti Alltag schi gäprägt händ. Äbä so Freud und Leid gäteilt und midänand gätragä händ. Ischt das authentisch mit Walsärstolz?

Aschtigs Holz värstummt immer meh … Ärwachänd! Und werränd Eu, miär sind z ünschnä Nachchommä schuldig. Chempfä und Redä midänand, das ischt für mi Walsärstolz!
Mit ämänä nachdeichändä Walsärgruäz.

Daniela Risch